तुळजापूर तालुका बार असोसिएशन (विधिज्ञ संघ) च्या सन 2026 साठी होणाऱ्या पदाधिकाऱ्यांच्या निवडणूक प्रक्रियेला अधिकृत सुरुवात झाली असून, उपाध्यक्ष (महिला – राखीव) पदासाठी ॲड. मा. सौ. अंजली साबळे यांची बिनविरोध निवड झाल्याने विधिज्ञ वर्तुळात समाधान व आनंदाचे वातावरण आहे.
तुळजापूर विधिज्ञ संघाच्या निवडणूक समितीने जाहीर केलेल्या कार्यक्रमानुसार दि. 07 जानेवारी 2026 रोजी मतदार यादी निश्चित करण्यात आली. त्यानंतर दि. 08 व 09 जानेवारी 2026 रोजी उमेदवारी अर्ज दाखल करण्याची प्रक्रिया पार पडली. महिला उपाध्यक्ष पदासाठी एकमेव अर्ज दाखल झाल्याने ॲड. अंजली साबळे यांची बिनविरोध निवड अधिकृतपणे घोषित करण्यात आली.
उर्वरित पदांसाठी दि. 12 जानेवारी 2026 रोजी अर्ज छाननी, तर दि. 13 जानेवारी 2026 रोजी अर्ज माघारीची प्रक्रिया पार पडणार असून दि. 17 जानेवारी 2026 रोजी मतदान व मतमोजणी एकाच दिवशी होणार आहे.
या निवडणुकीत अध्यक्ष, उपाध्यक्ष (महिला – राखीव), सचिव, सहसचिव व कोषाध्यक्ष या पदांसाठी निवड केली जाणार आहे. संपूर्ण निवडणूक प्रक्रियेसाठी निवडणूक निर्णय अधिकारी म्हणून ॲड. तानाजी जगताप, तर सहाय्यक निवडणूक अधिकारी म्हणून ॲड. संजय कपसे यांची नियुक्ती करण्यात आली आहे. तसेच मतदान केंद्र अध्यक्ष म्हणून ॲड. बाळाजी देशमाने, मतगणना प्रमुख म्हणून ॲड. सुजित गायकवाड व मतगणना सहाय्यक म्हणून ॲड. हंगरगेकर भाऊ कामकाज पाहणार आहेत.
ॲड. अंजली साबळे या केवळ एक अभ्यासू व अनुभवी विधिज्ञ म्हणूनच नव्हे, तर लिंगायत समाजाच्या तुळजापूर तालुका महिला अध्यक्ष म्हणूनही सामाजिक कार्यात सक्रिय आहेत. तसेच त्या भारतीय जनता पार्टीच्या सक्रिय कार्यकर्त्या असून, सन 2026 साठी इच्छुक उमेदवार म्हणूनही सध्या चर्चेत आहेत. त्यांच्या या बिनविरोध निवडीबद्दल अनेक ज्येष्ठ वकील, सहकारी व विधिज्ञ बांधवांनी अभिनंदन केले असून, त्यांच्या कार्यकौशल्याचा व अनुभवाचा लाभ बार असोसिएशनला होईल, अशी अपेक्षा व्यक्त केली जात आहे.
