अनैतिक संबंधांचा अडसर ठरलेल्या १३ वर्षीय पुतण्याचा चुलत्याकडून निर्घृण खून; तामलवाडी पोलिसांची २४ तासांत आरोपीस अटक

अनैतिक संबंधांचा अडसर ठरलेल्या १३ वर्षीय पुतण्याचा चुलत्याकडून निर्घृण खून; तामलवाडी पोलिसांची २४ तासांत आरोपीस अटक
तामलवाडी (ता. तुळजापूर) – अनैतिक संबंधांची माहिती वडिलांना सांगत असल्याचा राग मनात धरून चुलत्यानेच आपल्या १३ वर्षीय पुतण्याच्या डोक्यात कुऱ्हाडीचा घाव घालून निर्घृण खून केल्याची धक्कादायक घटना तामलवाडी परिसरात उघडकीस आली आहे. या खुनाचा तामलवाडी पोलिसांनी अवघ्या २४ तासांत छडा लावत आरोपीस जेरबंद केले असून पोलिसांच्या कार्यक्षमतेचे सर्वत्र कौतुक होत आहे.
मिळालेल्या माहितीनुसार, तुळजापूर तालुक्यातील तामलवाडी शिवारात राष्ट्रीय महामार्गालगत कदम यांची शेतजमीन आहे. सदर शेत बटईने दत्ता कोरे यांच्याकडे होती. या ठिकाणी ओमकार देविदास कांबळे (रा. कोळसुर, ता. उमरगा) हा आपली भावजयी ज्योती कांबळे हिच्यासोबत सालगडी म्हणून काम करत होता. त्यांच्यासोबत भावजयीचा १३ वर्षीय मुलगा कृष्णा सदानंद कांबळे हा देखील राहत होता.
दरम्यान, कृष्णा कांबळे याला चुलता व आईमधील अनैतिक संबंधांची माहिती होती. तो ही बाब वडील सदानंद कांबळे यांना सांगत असल्याने तो आरोपीस अडथळा ठरत होता. याच रागातून आरोपी ओमकार कांबळे याने दिनांक ०१ जानेवारी रोजी दुपारी सुमारे १२ वाजता साठवण तलावातील पाणी उपसा करणाऱ्या विद्युत पंपाचा पाईप बसवण्याच्या बहाण्याने कृष्णा यास तलावाजवळ नेले. तेथे त्याच्या डोक्यात कुऱ्हाडीचा घाव घालून त्याचा खून केला व मृतदेह तलावाजवळील गवतामध्ये फेकून आरोपी फरार झाला.
दि. ०५ जानेवारी रोजी सदर मृतदेह आढळून आल्यानंतर तामलवाडी पोलिसांनी प्रथम आकस्मात मृत्यूची नोंद केली. मयताची ओळख पटवून, गुप्त बातमीदार व तांत्रिक विश्लेषणाच्या आधारे तपास करत आरोपी ओमकार देविदास कांबळे यास उमरगा तालुक्यातील कोळसुर गावातून ताब्यात घेतले. चौकशीदरम्यान आरोपीने खुनाची कबुली दिली.
या प्रकरणी तामलवाडी पोलीस ठाण्यात दिनांक ०६ जानेवारी रोजी गु.र.नं. ४/२०२६ अन्वये भारतीय न्याय संहितेच्या कलम १०३(१) अंतर्गत गुन्हा दाखल करण्यात आला आहे.
ही उल्लेखनीय कारवाई पोलीस अधीक्षक रितू खोकर, अप्पर पोलीस अधीक्षक शफकत आमना, उपविभागीय पोलीस अधिकारी डॉ. निलेश देशमुख यांच्या मार्गदर्शनाखाली तामलवाडी पोलीस ठाण्याचे सहायक पोलीस निरीक्षक गोकुळ ठाकुर यांच्यासह जुबेर काझी, दिनकर तोग्गी, नितीन भोसले, नजीर बागवान, सुरज नरवडे, उमेश माने, तुराब शेख, हणमंत कोरे यांनी यशस्वीपणे पार पाडली. पुढील तपास तामलवाडी पोलीस करत आहेत.