इंदापूर (पुणे) – इंदापूर तालुक्यातील भिगवण परिसरात एका महिलेवर झालेल्या अत्याचाराच्या संतापजनक प्रकाराने सर्वत्र खळबळ उडाली आहे. ही धक्कादायक घटना १० सप्टेंबर रोजी पहाटे साडेतीन वाजण्याच्या सुमारास घडली होती.
महिलेला दुचाकीवर लिफ्ट देण्याचा बहाणा करून नराधमाने तिच्यावर अत्याचार केला.
या प्रकरणी भिगवण पोलिसांनी आरोपी जाक्या चव्हाण (राहणार – माळवाडी लिंगाळी, ता. दौंड) याला अटक केली आहे. पोलिसांनी या घटनेनंतर सहा पथकं तयार करून आरोपीचा शोध सुरु केला होता. तब्बल शंभरहून अधिक सीसीटीव्ही कॅमेऱ्यांचे फुटेज तपासून आणि गुप्त खबऱ्यांच्या मदतीने अखेर पोलिसांना आरोपीला बेड्या ठोकण्यात यश आलं. घटनेचा तपशील : १० सप्टेंबर रोजी संबंधित महिला प्रवास करत असताना आरोपीने तिला बाईकवर लिफ्ट देण्याचा प्रस्ताव ठेवला. मात्र मळद गावाजवळील रेल्वे ब्रिज परिसरात पोहोचल्यावर आरोपीने दुचाकी थांबवून तिला जीवे मारण्याची धमकी दिली आणि झाडाझुडपात नेऊन अत्याचार केला.
या प्रकरणी भिगवण पोलिस ठाण्यात गुन्हा दाखल करण्यात आला होता.
तपासात पोलिसांचे यश : या प्रकरणाचा तपास करताना पोलिसांनी संशयित आरोपीचा मागोवा घेण्यासाठी सहा विशेष पथकं तयार केली. स्थानिक गुन्हे शाखा, भिगवण पोलीस ठाणे आणि दौंड पोलीस ठाण्याचे अधिकारी यांनी समन्वय साधत ही धडक कारवाई केली.
अखेर आरोपी जाक्या कोंडके (चव्हाण) याला पोलिसांनी ताब्यात घेतलं असून त्याने गुन्ह्याची कबुली दिली आहे.
कारवाईत सहभागी अधिकारी : ही कारवाई पुणे जिल्हा पोलीस अधीक्षक संदीपसिंह गिल्ल, अपर पोलीस अधीक्षक रमेश बोपडे, उपविभागीय पोलीस अधिकारी डॉ. सुदर्शन राठोड, स्थानिक गुन्हे शाखेचे वरिष्ठ पोलीस निरीक्षक अविनाश शिळीमकर, दौंड पोलीस ठाण्याचे निरीक्षक गोपाळ पवार यांच्या मार्गदर्शनाखाली करण्यात आली.तसेच भिगवण पोलीस ठाण्याचे सहाय्यक निरीक्षक विनोद महांगडे, पीएसआय रूपेश कदम, पीएसआय अमित पाटील, तसेच पोलिस अंमलदार सुभाष राऊत, नितीन बोराडे, अमीर शेख, महेश उगले, सचिन पवार, संतोष मखरे, कुलदीप संपकाळ यांच्या पथकाने ही कारवाई पार पाडली. सध्या या प्रकरणाचा पुढील तपास महिला पोलीस उपनिरीक्षक दिपाली गायकवाड करत आहेत.
