सोलापुरातून दोन धक्कादायक आणि थरारक घटना समोर आल्या आहेत. पहिल्या घटनेत जमिनीतून गुप्तधनाचा हंडा काढून देतो असा खोटा दावा करत एका भोंदू बाबाने तब्बल १ कोटी ८७ लाख रुपयांची फसवणूक केल्याचे उघड झाले आहे. तर दुसऱ्या घटनेत मध्यरात्रीच्या सुमारास शस्त्रधारी टोळीने एका सोसायटीत दरोडा टाकून परिसरात भीतीचे वातावरण निर्माण केले आहे.
१ कोटी ८७ लाखांची फसवणूक – भोंदू बाबा जेरबंद सोलापुरातील गोविंद वंजारी यांना जमिनीत गुप्तधन काढून देतो असे सांगून फसवणूक करणाऱ्या मोहम्मद कादर शेख या भोंदू बाबाला सोलापूर गुन्हे शाखेच्या पोलिसांनी जेरबंद केले आहे. कादर शेख याने लोकांच्या अंधश्रद्धेचा गैरफायदा घेत लाखो रुपयांची लूट केल्याचे तपासात समोर आले आहे. सोलापुरात अनेकांना फसवणूक करणारा हा भोंदू बाबा कर्नाटकातील विजापूर येथून अटक करण्यात आला. या कारवाईत सहाय्यक पोलीस निरीक्षक दत्तात्रय काळे यांच्या नेतृत्वाखालील पथकाने ही उत्कृष्ट कामगिरी बजावली. तक्रार प्राप्त होताच पोलिसांनी सापळा रचून त्याच्या राहत्या घरातून त्याला ताब्यात घेतले.
लहान मुलाच्या गळ्याला चाकू लावून दरोडा दरम्यान, दुसऱ्या घटनेत सोलापूर शहरातील अभिषेक नगर, अवंती हौसिंग सोसायटी येथे मध्यरात्रीच्या अडीचच्या सुमारास घडलेल्या दरोड्याने परिसर हादरून गेला आहे.
शस्त्रधारी टोळीने घराचा दरवाजा तोडून आत प्रवेश केला आणि लहान मुलाच्या गळ्याला चाकू लावत घरमालकावर हल्ला केला. या वेळी सोनं आणि रोख रक्कम लुटण्यात आली. यानंतर टोळीने खालील मजल्यावरील दुसऱ्या घरात घुसून तसाच दरोडा टाकला. पोलिसांनी तातडीने घटनास्थळी धाव घेतल्याने चोरटे इतर घरे लुटण्यापासून थांबले. ते मात्र अंधाराचा फायदा घेत पसार झाल पोलिसांचा तपास सुरू घटनेची माहिती मिळताच उपायुक्त आश्विनी पाटील यांनी घटनास्थळी भेट देत पंचनामा केला. फॉरेन्सिक तज्ज्ञ आणि गुन्हे शाखेचे पथक पुरावे गोळा करत आहेत. सोलापूर पोलिसांनी दोन्ही घटनांमध्ये गुन्हा दाखल करून तपास सुरू केला आहे.
दोन दिवसांत सलग घडलेल्या या घटनांनी सोलापूरकरांमध्ये भीतीचं वातावरण निर्माण झालं असून, पोलिसांनी नागरिकांना सावध राहण्याचे आवाहन केले आहे.
