तुळजापुर प्रतिनिधि : शाम इंगळे तुळजापूर तालुक्यातील शिंदफळ येथे घडलेल्या सत्तार यासीन इनामदार खून प्रकरणातील तपासात झालेल्या हलगर्जीपणाची गंभीर दखल घेत अखेर सहाय्यक पोलीस निरीक्षक (API) सुरेश नरवडे यांना निलंबित करण्यात आले आहे.
मार्च महिन्यात झालेल्या या हत्येचा तपास नरवडे यांच्या जबाबदारीवर होता. कायद्यानुसार अटकेनंतर 90 दिवसांच्या आत न्यायालयात दोषारोपपत्र दाखल करणे बंधनकारक असते. मात्र नरवडे यांनी हे दोषारोपपत्र वेळेत सादर केले नाही. या तांत्रिक त्रुटीचा फायदा घेत आरोपींनी जामिनासाठी अर्ज केला आणि केवळ दोषारोपपत्र वेळेत दाखल न झाल्याने न्यायालयाने त्यांना जामीन मंजूर केला. या प्रकारामुळे पोलीस यंत्रणेच्या कार्यपद्धतीवर गंभीर प्रश्नचिन्ह निर्माण झाले. मयत सत्तार इनामदार यांच्या कुटुंबीयांनी देखील जिल्हा पोलीस अधीक्षकांकडे निवेदन देऊन संताप व्यक्त केला होता.शेवटी तपासातील गंभीर त्रुटी, हलगर्जीपणा आणि आरोपींना अप्रत्यक्ष मदत केल्याचा ठपका ठेवत API सुरेश नरवडे यांना निलंबित करण्याची कारवाई करण्यात आली आहे.
