पुणे : लोणी काळभोर पोलीस ठाण्याच्या हद्दीत घरफोडी करून तब्बल चार वर्षांपासून पोलिसांना चकवा देणाऱ्या अट्टल गुन्हेगाराला अखेर अटक करण्यात आली आहे. गुन्हे शाखेच्या युनिट क्र. 6 च्या पथकाने मंगळवारी (दि. 8) कोम्बिंग ऑपरेशनदरम्यान हडपसर येथील बिराजदार नगर परिसरातून ही कारवाई केली.
अटक करण्यात आलेल्या आरोपीचे नाव दिपक नामदेव घारोळे (वय 24, रा. गल्ली नं. 3, बिराजदार नगर, हडपसर, पुणे) असे आहे.
2021 पासून फरार सन 2021 मध्ये लोणी काळभोर पोलीस ठाण्यात आरोपीवर भारतीय दंड संहिता कलम 457, 380 प्रमाणे गुन्हा दाखल होता. मात्र गुन्हा दाखल झाल्यापासून आरोपी वेशांतर करून फरार राहून पोलिसांना चकवा देत होता.
खबऱ्याच्या माहितीवर कारवाई
गुन्हे शाखेच्या पथकाला खबऱ्यामार्फत माहिती मिळाली की दिपक घारोळे हा बिराजदार नगरजवळील कॅनलच्या कडेला उभा आहे. त्यानुसार पथकाने छापा टाकत मोठ्या शिताफीने त्याला अटक केली. आरोपीची वैद्यकीय तपासणी करून त्याला पुढील कारवाईसाठी लोणी काळभोर पोलिसांच्या ताब्यात देण्यात आले.
उल्लेखनीय कामगिरी ही कारवाई गुन्हे शाखेच्या युनिट क्र. 6 चे पोलीस निरीक्षक वाहिद पठाण यांच्या मार्गदर्शनाखाली सहाय्यक पोलीस निरीक्षक राकेश कदम, पोलीस हवालदार नितीन मुंढे, कानिफनाथ कारखेले, काटे, लांडे, धाडगे व सहकाऱ्यांनी केली.
