तुळजापूर (जि. धाराशिव) – शहरातील गजबजलेल्या भागात भरदिवसा मोठी चोरी घडल्याने तुळजापूरात खळबळ उडाली आहे. जहीराबाद (जि. संघारेड्डी, तेलंगणा) येथील सिनियर सिव्हिल जज कविता देवी पर्णचंद्राराव गंटा (वय ४८) यांच्यावर ही चोरी झाली असून तब्बल ५ लाख २४ हजार रुपयांचा ऐवज लंपास झाला आहे. मिळालेल्या माहितीनुसार, दि. २८ सप्टेंबर रोजी संध्याकाळी साडेसातच्या सुमारास कविता देवी गंटा हॉटेल अशोकमध्ये जेवणासाठी गेल्या होत्या. दरम्यान, हॉटेलबाहेर उभी असलेली त्यांची महिंद्र एक्सयूव्ही ७०० (क्र. टीएस-२८ एल-६६६६) ही कार अज्ञात चोरट्याने फोडली.
गाडीत ठेवलेली ईटकरी बॅग व काळ्या रंगाची हँडबॅग चोरट्याने चोरून नेली. या बॅगमध्ये १२० ग्रॅम सोन्याचे दागिने, मोबाईल फोन, रोख रक्कम ३५ हजार रुपये व नवे कपडे असा एकूण ५ लाख २४ हजार रुपयांचा मुद्देमाल होता. घटनेची माहिती मिळताच तुळजापूर पोलिसांनी पंचनामा करून फिर्याद नोंदवली आहे. कविता देवी गंटा यांनी दिलेल्या तक्रारीवरून भा.दं.वि. कलम ३०३(२) अंतर्गत गुन्हा दाखल करण्यात आला आहे. या चोरीमुळे शहरात मोठी खळबळ उडाली असून तुळजापूर पोलिसांनी चोरट्यांचा शोध सुरू केला आहे.
