पुणे संपादक: बापु फुंदे
मागील काही दिवसांत झालेल्या मुसळधार पावसामुळे थेऊर परिसरात (ता. हवेली) पूरसदृश परिस्थिती निर्माण झाली होती. या पुरामुळे नागरिकांचे जनजीवन विस्कळीत झाले असून, शेतमाल व पशुधनाचे मोठे नुकसान झाले आहे. या घटनेप्रकरणी नैसर्गिक पाण्याच्या प्रवाहात अडथळे निर्माण करून पूरस्थितीला कारणीभूत ठरल्याप्रकरणी शिक्षण सम्राट प्रसादराव पाटील यांच्यासह सहा जणांवर गुन्हा दाखल करण्यात आला आहे.
गुन्हा दाखल झालेल्यांची नावे अशी : प्रसादराव दत्ताजीराव पाटील दिलीप कुंजीर दत्तात्रय महादेव चव्हाण सुषमा महेश थोरात (सर्व रा. थेऊर, ता. हवेली, जि. पुणे) गोविंद जिवन उत्तमचंदानी राजेश जीवन उत्तमचंदानी (दोघेही रा. सिस्का हाऊस, लोहगाव, पुणे) या प्रकरणी लोणी काळभोरचे ग्राम महसूल अधिकारी अर्जुन स्वामी यांनी फिर्याद दिली असून, अपर तहसिलदार तृप्ती कोलते पाटील यांच्या तर्फे कारवाई करण्यात आली आहे.
आरोप काय? प्रसादराव पाटील यांनी गट नंबर 63 मध्ये संरक्षण मिल उभारून ओढ्याचे पात्र अरुंद केले. दिलीप कुंजीर, दत्तात्रय चव्हाण व सुषमा थोरात यांनी गट नंबर 163 व 164 मध्ये शासनाची परवानगी न घेता ओढा बुजवून अनधिकृत प्लॉटींग केली.गोविंद व राजेश उत्तमचंदानी यांनी गट नंबर 663 मध्ये जमीन खरेदी करून ओढा बुजवून अनधिकृत प्लॉटींग केली.
परिणाम : या सर्व बांधकामांमुळे नैसर्गिक पाण्याच्या प्रवाहात अडथळे निर्माण होऊन थेऊर फाटा ते कांबळेवस्ती व रुकेवस्ती परिसरात मोठा पूर आला. नागरिकांच्या घरात पाणी शिरले, शेतजमिनी व पिकांचे नुकसान झाले, पशुधन हानीग्रस्त झाले.कायदेशीर कारवाई : आरोपींवर भारतीय न्याय संहिता कलम 270, 125, 324(4), 293, 3(5), आपत्ती व्यवस्थापन अधिनियम 2005 चे कलम 51, 53 तसेच पर्यावरण संरक्षण अधिनियम 1986 चे कलम 7 व 15 अंतर्गत गुन्हे दाखल करण्यात आले आहेत. पुढील तपास लोणी काळभोर पोलीस ठाण्याचे सहाय्यक पोलीस निरीक्षक सोमनाथ नाळे करत आहेत.
