मोहोळ (प्रतिनिधी) : सोहम तेली मोहोळ तालुक्यातील सीना-कोळगाव धरणातून मोठ्या प्रमाणात पाणी सोडल्याने सीना नदीला पूर आला आहे. यामुळे शेतकऱ्यांचे मोठे नुकसान झाले असून, वाहतूकही विस्कळीत झाली आहे. जिल्हाधिकारी कुमार आशीर्वाद यांनी मंगळवारी दुपारी दीड वाजता आष्टे-कोळेगाव बंधाऱ्यावर भेट देऊन वस्तुस्थितीची पाहणी केली. यावेळी त्यांनी तहसीलदारांना तात्काळ बाधित क्षेत्रातील पंचनामे करण्याचे आदेश दिले. गेल्या आठवड्यापासून तालुक्यात जोरदार पाऊस झाला आहे. त्यामुळे काढणीला आलेली व शेतात पडलेली उडीद, सोयाबीन, कांदा, मका ही पिके पाण्याखाली गेली आहेत. तालुक्यातील एकूण १४ बंधाऱ्यांपैकी मलिकपेठ, बोपले, कोळेगाव, शिरापूर सो. व अर्जुन सोंड हे पाच बंधारे पाण्याखाली गेले असून या बंधाऱ्यांवरील वाहतूक प्रशासनाने बंद केली आहे. जिल्हाधिकाऱ्यांनी बाधित शेतकऱ्यांशी संवाद साधत नुकसानीची माहिती घेतली. धरणातून आणखी पाणी सोडण्याची शक्यता असल्यामुळे खबरदारी म्हणून नागरिकांनी आवश्यकता भासल्यास स्थलांतर करण्याचे आवाहनही त्यांनी केले आहे. पंचनाम्यासाठी तलाठी, कृषी सहाय्यक व ग्रामसेवक यांचे संयुक्त पथक तयार करण्याचे आदेश तहसीलदार सचिन मुळीक यांनी दिले आहेत.
या पाहणीदरम्यान तहसीलदार मुळीक, सावळेश्वर मंडलाधिकारी प्रकाश दळवी, मोहोळ मंडलाधिकारी विजय शिवशरण, ग्राम महसूल अधिकारी एस. एस. बिजले व इतर कर्मचारी उपस्थित होते.
पोलीस प्रशासनाचा इशारा
मोहोळ पोलीस ठाण्याचे पोलीस निरीक्षक हेमंत शेडगे यांनी नागरिकांना सतर्कतेचे आवाहन केले आहे. नदीकाठावर विद्युत पंप काढताना विद्युत प्रवाह बंद असल्याची खात्री करावी, पाण्यात उतरू नये तसेच सेल्फी घेण्याचा मोह टाळावा, असे त्यांनी स्पष्ट केले. पूरस्थितीवर नियंत्रण ठेवण्यासाठी प्रत्येक बंधाऱ्यावर दोन पोलीस कर्मचाऱ्यांची नेमणूक केली आहे.
