पुणे संपादक; बापु फुंदे – नाना पेठेत ५ सप्टेंबर रोजी झालेल्या आयुष कोमकर हत्याकांडातील फरार मुख्य आरोपी कृष्णा आंदेकर याने मंगळवारी समर्थ पोलीस ठाण्यात आत्मसमर्पण केले. आंदेकर टोळीचा कुख्यात चेहरा मानला जाणारा कृष्णा आंदेकर हा दिवंगत बंडू आंदेकर याचा मुलगा आणि वनराज आंदेकरचा भाऊ आहे.
काय आहे प्रकरण? आयुष कोमकर याची नाना पेठेत ९ गोळ्या झाडून निर्घृण हत्या करण्यात आली होती. कोमकरवर गोळीबार करून आंदेकर टोळीने वनराज आंदेकरच्या हत्येचा बदला घेतल्याचे उघड झाले होते. या कटाचा मास्टरमाइंड म्हणून कृष्णा आंदेकरचे नाव पुढे आले होते.
आंदेकर कुटुंबाची पार्श्वभूमी बंडू आंदेकरने पुण्यातील गुन्हेगारी आणि ठेकेदारीवर दीर्घकाळ वर्चस्व गाजवले. त्याच्या मुलांनी आणि जावयांनी त्याचे साम्राज्य पुढे चालवले. उदयकांत, लक्ष्मी आणि राजश्री आंदेकर हे नगरसेवक राहिले असून, वनराज आंदेकरने राजकीय पातळीवर आणि टोळीच्या व्यवहारातही मजबूत पकड निर्माण केली होती. त्याच्यामुळे कोमकर बंधूंशी मतभेद तीव्र झाले.
गुन्हेगारीकडे ओढा लहानपणापासूनच गुन्हेगारीकडे आकर्षित असलेल्या कृष्णा आंदेकरने वयाच्या १७ व्या वर्षीच पहिली फायरिंग केली होती. त्यानंतर सुरज ठोंबरे आणि सोमनाथ गायकवाड यांच्याशी त्याचे तीव्र वाद सुरू झाले. क्लब ताब्यात घेण्यापासून ते प्रतिस्पर्ध्यांवर जीवघेणे हल्ले करण्यापर्यंत त्याने अनेक कृत्ये केली. २०२३ मध्ये नाना पेठेत निखिल आवाडेवर झालेल्या प्राणघातक हल्ल्यातही कृष्णाचा सहभाग उघड झाला होता. मात्र, तांत्रिक कारणांमुळे त्याच्यावर लावलेला मोक्का टिकला नाही आणि तो जामिनावर बाहेर आला. पोलिसांचा श्वास सोडवला गेल्या काही दिवसांपासून कृष्णा आंदेकर फरार होता. त्याच्या शोधासाठी पुणे पोलिसांकडून मोठा बंदोबस्त उभारण्यात आला होता. शेवटी मंगळवारी त्याने समर्थ पोलीस ठाण्यात आत्मसमर्पण करून पोलिसांचा श्वास सोडवला.
