पुणे : धक्कादायक घटनेत, ४० वर्षीय कर्मचाऱ्याचा बॉसकडे आजारपणामुळे Sick Leave मागितल्यानंतर अवघ्या १० मिनिटांत हृदयविकाराने मृत्यू झाला. या घटनेमुळे सोशल मीडियावर हळहळ व्यक्त होत आहे.
कर्मचारी शंकर (वय ४०) याने पाठदुखीमुळे कामावर येऊ शकत नसल्याचं आपल्या वरिष्ठांना मेसेज केला होता. त्यावर बॉसनं “ठीक आहे, आराम कर” असं उत्तर दिलं. पण काही मिनिटांतच शंकरला हृदयविकाराचा झटका आला आणि त्याचा मृत्यू झाला. या घटनेनंतर वरिष्ठ के. व्ही. अय्यर यांनी सोशल मीडियावर भावनिक पोस्ट शेअर केली. “तो सहा वर्षे माझ्या टीमचा भाग होता. निरोगी, तंदुरुस्त होता. विवाहीत असून त्याला एक मुलगा आहे. त्याचं अचानक जाणं आम्हाला स्वीकारणं कठीण आहे,” असं त्यांनी म्हटलं. शंकरच्या निधनानंतर त्याच्या कुटुंबावर दुःखाचा डोंगर कोसळला आहे. दरम्यान, ही घटना सोशल मीडियावर मोठ्या प्रमाणात व्हायरल होत असून, अनेकांनी शोकसंवेदना व्यक्त केल्या आहेत.
